لاشيء تغير .. إلا للاسواء.


لاشيء تغير .. إلا للاسواء.

تنوية : الكثير والكثير من الحنق والغضب في هذه المقالة

للأسف الشديد وبعد أن استهلكت الكلمات في وصف حالة التردي التي وصلنا اليها وعبثاً نحاول ان نصلح واكتشفت ان الخطأ عربد فينا وأننا بدلاً من أن نلوم أنفسنا نحن قبل ان نلوم زماننا ونعيبة و نلعنة فالزمن لا يتغير ، لكن البشر يتغيرون للاسوأ والعديد من الامور شهدها في هذا الرمضان لم اجد لها تفسير سوى بانحدار الاخلاق و زيف الناس و نفوسهم الرديئة و زيف أقنعتهم :

  • كل شخص محمل حالوا جميله انو صايم وقارف الي حولية : الموظف مش جاي عبالوا يكمل المعاملة وبيماطل فيها لانو صايم ، الشغيل محملك جميلة انو بدو يصلح اشي في بيتك لانو صايم ، شوفير التكسي بدوش يوصلك على البلد بحجة ازمة لانو صايم وريحة السيارة مفحفحة دخان.

  • التاجر بيصلي اول صف والمصحف ما بنزل من ايدوا لما تفوت على المحل ، ولما تشتري بتتفاجئ انو كل اشي تضاعف 5 مرات في رمضان وليش يا شيخ؟ بيقول : بتعرف غلي البنزين والدولار نازل و انوصة الدهب بالعلالي ؟!!؟؟!

  • بتلاقي الشيخ لحيتوا متر وما شاء الله عنو و بيفتي حرام وحلال ، وفي بيتوا زفت بمد ايدوا على مرتوا وبخيل على ولادوا وقامع بناتوا ومذوقهم الويل.

  • فش اشي اسموا ذوق الواحد بيصف سيارتوا بنص الشارع والله لا يرد بقية السيارت المهم هو يلاقي صفة.

  • حتى الحكومة محملتك جميلة وأخر انجازاته العظيمة التي تفتق فيها ذهنيتها الفذة ½ الراتب ، وعيش يا شعب ، معلش عيد ومدارس و عيديات و جامعات مع بعض ، يلا بيدبر حالوا الشعب ما انتوا شعب الجبارين !!

  • الناس متفاعلة بطريقة سلبية مع المظاهرات العربية وبيقلك مؤامرة الواحد ماشاء الله قلب محلل سياسي وفش حدا غيرهم بيفهم بالسياسة مع انو مؤهلة العلمي 4 سنيين صياعة و 7 شهور حبس ؟؟؟

  • لحد هلا الناس ما عزفت او تركت البضاعة الاسرائيلية ، وتجارنا الفجار بيفتحوا وكالات الها والمنتوج الوطني مرمي قال لانو الناس بدهوش غير البرنجي (اشي ممتاز يعني) بتسأل الواحد بيقولك : انا مابدخل بيتي الا اسرائيلي لانو "الف الف " يا عمي بدي انبسط وانا باكل ؟؟؟ ليشي ياعمي وين كرامتك ؟ وعزت نفسك ؟ لو الك ابن استشهد او ابوك انحبس او بيتك انهد بتحكي هل حكي ؟ طيب وفوق ما بيذلوك على الحواجر و بيهودوا ارضك والقدس بتفوتهاش الا بعد ما تصير 50 سنة او بتصريح علاج بتشتري بضاعتهم وبتكافئهم ؟

  • تجار العقارات بيخافوش الله 90% من عمارات نابلس باعوا صحابهما غرف الحارس على انها شقة علشان ما استكفى صاحب الملك بمربح 250 الف دينار صافي لسا بدو حقها 10000 دينار طمع وحقارة غير موظف البلدية التي ارتشى علشان تغيير المخطط وينزلها شقة مع انو الخدمات مية وكهرباء ما بتوصل العمارة الا بغرفة حارس وكراجات ، و ¾ الكراجات انباعت شقق والسيارات بتصف بالشارع علشان تزيد الازمة.

  • عزمن البلدية القديمة مخالفات البنى ما كانت بهالعدد و اول مرة بشوف عمارات بتبني بحرم الشارع او بدون ارتدادات قانونية او حتى رصيف ولما تسأل بيقلك مهو دفع المخالفة ؟؟!؟!؟! أي مخالفة هاي الي بتخلي الواحد يتعدى على حرم الشارع وبضيع الارتدادات القانونية وتكشف حرمة بيت جارك؟؟؟ صحيح مهي بلدية اصلاح و تغيير بس للاسواء.
  • فش شارع الا محفور بنابلس ، وكلها جور والزفتة تاني يوم بتهبط وكأنوا الشارع مش مزفت.

اشي بيخنق وشو كمان يحكي الواحد اشي بيقرف .

في حكي كتير ما خلصتوا بس هاد الي اجى على بالي هلأ....

تعليقات

  1. كل اللي حكيته مليون بالميّة صح
    اكثر فئة بتنرفزني همه اللي بعصبوا بحجّة الصيام, يا حبيبي اذا لهالدرجة الدخان عامي قمارك, روح افطر , تحملنيش جميلة بصيامك

    ردحذف
  2. له له,, كل هاد كاتمه ف نفسك,؟؟

    إزا بدك إتدقر ع كل حدن بيغلط,, رح بتنجلط
    كب ورا ضهرك عمو,, فش شي بستاهل

    ردحذف
  3. لونار :
    والله يا عمي ما اكتر منهم هدول شوهوا رمضان ، وقرفونا هدول ... وانا دايما بقول مثلك تقرفناش افطارك ارحم من صيامك ..

    ام عمر :
    والله اشي بيفق يا ام عمر واشي بيغل .. بس شو نعمل ... بدها كتير البلد لتسير بلد صح ..

    وكل عام وانتوا بخير الكم ..
    فرط رمضان ...

    ردحذف

إرسال تعليق

المشاركات الشائعة من هذه المدونة

النينجا القاتل : قصة منتهى الدموية ... ذو حبكة درامية ضعيفة

عيد العمال العالمي.. عمّال على بطّال

مواطن ملتزم بالقانون : عندما يؤخذ الحق عنوه !